ကြောက်မယ်ဖွယ် ကမ္ဘာ့ရှေးဟောင်း ကျိန်စာများ

Written By Mhai Wai
ကျိန်စာ Curse ဆိုသည်မှာ တစ်စုံတစ်ယောက် အပေါ် ဘေးဆိုး အန္တရာယ် ကျရောက်ပါစေဟု တိုင်တည် ထားခြင်း၊ တန်ခိုးရှင်အား တိုင်တမ်းခြင်းကြောင့် ကျရောက်သော အန္တရာယ်၊ ကျိန်ဆဲခြင်း၊ ကျမ်းသစ္စာ ဆိုခြင်း၊ တားမြစ်ခြင်းများ၊ ကပ်ဆိုးများ ဆိုက်ရောက်ပါစေ၊ ငရဲကျပါစေ ဟူသော ဆုတောင်း ကျိန်ဆဲမှုများကို ခေါ်ဆိုသည်။
ဆုတောင်း မေတ္တာပို့ခြင်း၊ ကျိန်စာတိုက်ခြင်း၊ ဆဲရေးခြင်း တို့သည် လူ့စိတ်ပိုင်းဆိုင်ရာ ယဉ်ကျေးမှု အမွေအနှစ်များ ဟု ခေါ်ဆိုနိုင်သည်။ လူသည် အရိုင်းဘ၀မှ အယဉ်ဘ၀သို့ တိုးတက်ပြောင်းလဲ လာကတည်းက ထိုစိတ်ပိုင်း ဆိုင်ရာများ ပါလာခဲ့ကြသည်။

ရှေးစဉ်အခါမှ စ၍ ယနေ့ အချိန်ထိ ကျိန်စာတိုက်ခြင်း၊ ကျိန်ဆဲခြင်းများကို လူတို့ လုပ်ဆောင် ခဲ့ကြသည်။ ကမ္ဘာ့ သမိုင်းအလယ်ဖြစ်သည့် အီဂျစ် သမိုင်း၊ မြန်မာ့ ရှေးသမိုင်းဖြစ်သည့် ပုဂံသမိုင်းတို့တွင် ထိတ်လန့် ကြောက်မက်ဖွယ် ထူးကဲလှသော ကျိန်စာများကို တွေ့နိုင်သည်။ ထိုခေတ်ကာလ လူသားများသည်လည်း ကျိန်စာများကို ယုံကြည် ကြောက်ရွံ့ ရိုသေကြလေသည်။
ယနေ့ခေတ် သိပ္ပံပညာ ထွန်းကားလာသော မျက်မှောက်ခေတ် မှာပင် ကျိန်စာများနှင့် ပတ်သက်ပြီး ဟုတ်မှန်နိုင်သည် ဆိုလောက်သော သံသယ ဖြစ်ဖွယ်များ ကြုံတွေ့လျက် ရှိခဲ့ကြသည်။ ပထမ ကမ္ဘာစစ် အပြီးက ဗြိတိသျှ ရှေးဟောင်း သုတေသနအဖွဲ့သည် အီဂျစ်ဘုရင် `တူတန်ခမန်´ ၏ ဂူသင်္ချိုင်းအား ရှာဖွေတူးဖော်ခဲ့ပြီး မံမီအလောင်းအား လန်ဒန်ပြတိုက်သို့ ရွှေ့ပြောင်း သယ်ဆောင် ခဲ့ဖူးသည်။ ဘုရင်`တူတန်ခမန်´၏ ဂူသင်္ချိုင်း တံခါးဝတွင်
`ထာဝရလောကကြီး၌ ငြိမ်းချမ်းစွာ လဲလျောင်း အိပ်စက်နေသော ငါဘုရင်အား နှောက်ယှက်သူတိုင်း မြေ၊ မီး၊ ရေ၊ လေ တို့၏ အန္တရာယ် ကျရောက်၍ အသေဆိုးနှင့် သေစေသော်´
ဟူ၍ ကျိန်စာတိုက် ထားလေသည်။

မကြာသော ကာလတွင် ရှေးဟောင်း သုတေသန တူးဖော်ရေး အဖွဲ့မှ ပညာရှင် လေးဦးသည် ဖြစ်နိုင်ဖွယ် ရှားပါးလှသော သေနည်းမျိုးဖြင့် ရှေ့ဆင့်နောက်ဆင့် သေကြရသည်။ တစ်ဦးသည် ဘီယာဆိုင်တွင် ဘီယာမော့ သောက်ရာမှ ဘီယာတို့သည် နှာခေါင်းအတွင်း ၀င်၍ အသက်ရှုရပ် သေဆုံးခဲ့သည်။ နောက်တစ်ဦးသည် ဆေးတံမီးညှိရာမှ မုတ်ဆိတ်ရှည်ကို မီးစွဲပြီး တစ်ကိုယ်လုံး မီးလောင်ကျွမ်း သေဆုံးရပြန်သည်။
နောက်တစ်ဦးမှာ မိမိ၏ အပန်ဖြေနေအိမ် အနောက်ရှိ အမှိုက်ကျင်း အတွင်း အမှိုက်ပစ်ရာမှ အရှိန်လွန်ကာ ကျင်းထဲကျ မြေပိလို့ သေရပြန်သည်။ နောက်ဆုံး တစ်ယောက်မှာ အသက် အငယ်ဆုံးနှင့် ကျန်းမာရေး အကောင်းဆုံး ပညာရှင်သည် ရုတ်တရက် လေဖြတ် သေဆုံးခဲ့ရပြန်သည်။ ဤအခါ လူတို့သည် ဘုရင် `တူတန်ခမန်´ ၏ ကျိန်စာကြောင့် သေဆုံးကြသည်ဟု သံသယ ရှိလာကြတော့သည်။

British archaeologist and Egyptologist Howard Carter (1874 – 1939) (left) and his assistant Arthur Callender (right) opening the entrance to the fourth chamber of Tutankhamen’s tomb, February 1923. (Photo by Hulton Archive/Getty Images)

အမေရိကန်၊ ၀ါရှင်တန်မြို့ စမစ်ဆွန်နီးယန်း ပြတိုက်တွင် ရှိသော Blue Diamond ကြီးသည်လည်း ကျိန်စာသင့် နေသည်ဟု ယူဆကြသည်။ ၎င်းစိန်ပြာကြီိး ရာဇ၀င်မှာ မြန်မာနိုင်ငံ၊ ပုဂံမြို့ဟောင်းရှိ ဟိန္ဒူဘုရားကျောင်း တစ်ခုအတွင်း ကိုးကွယ်ထားသော `ရာမ သီတာ´ ကျောက်စိမ်းရုပ်တုမှ စိန်ပြာကြီး ဖြစ်သည်ဟု အဆိုရှိခဲ့သည်။
၎င်းဘုရားကျောင်း တည်ဆောက်သူများက ရာမ၊ သီတာ နတ်များအား ပင့်ဖိတ်လို့ ကျိန်စာ တိုက်ခဲ့သည်ဟု အဆိုရှိခဲ့သည်။ ( အချို့ရာဇ၀င်များတွင်တော့ စိန်ပြာကြီးသည် အာနန္ဒာဘုရားမှဖြစ်ပြီး ပြင်သစ်လူမျိုး ရတနာကုန်သည်တစ်ယောက်မှ ခိုးယူသွားခဲ့သည်ဟု ပါရှိသည်)

၎င်းစိန်ပြာကြီိးသည် ပြင်သစ်ဘုရင် လူဝီ-၁၆ လက်သို့ ရောက်ခဲ့ဖူးသည်။ သူလက်ထဲစိန်ပြာကြီး မရောက်ရှိခင်ကပင် တဆင့်ပြီးတဆင့် စိန်ပြာကြီးပိုင်ဆိုင်သူ အများအပြား အကြောင်းအမျိုးမျိုးကြောင့်သေဆုံးခဲ့ရပြီးဖြစ်သည် ။ ၁၇၈၉ ခုနှစ် ပြင်သစ်တော်လှန်ရေးကြီး ဖြစ်ပွားသောအခါ ဘုရင်နှင့် မိဖုရားတို့အား ပြည်သူလူထုက ခေါင်းဖြတ် သတ်ဖြတ်လိုက်ကြသည်။
ဤသည်မှာ စိန်ပြာကြီး၏ ကျိန်စာကြောင့်ဟု ပြောစမှတ်ရှိခဲ့သည်။ ထိုစိန်ပြာကြီးသည် နောက်ပိုင်း ရုရှား ဇာဘုရင်၊ ကိုင်ဇာဘုရင်၊ ဆီဇာဘုရင် တို့ထံ လှည့်ပတ် ရောက်ရှိခဲ့ပြီး အားလုံးလည်း ထူးဆန်းဖွယ် မရဏသေခြင်း မျိုးဖြင့် ရင်ဆိုင် သေဆုံးခဲ့ကြရသည်။

ထို့အပြင် ကမ္ဘာကျော် တိုက်တန်းနစ် သင်္ဘောကြီး နစ်မြုပ် ရခြင်းမှာလည်း သဘာဝလွန် ဖြစ်ရပ်ကြောင့်ဟု အချို့ ယုံကြည်ကြသည်။
တိုက်တန်းနစ် သင်္ဘောပေါ်တွင် အမေရိကန် ပြတိုက်သို့ ပို့ရန်အတွက် ဆေးရည်စိမ် မံမီရုပ်အလောင်း တစ်ခု တင်ဆောင်ခဲ့သည်ဟု ဆိုကြသည်။ ထိုမံမီတွင် ပါရှိသော ကျိန်စာကြောင့် သင်္ဘောကြီး ဘေးသင့်ရသည်ဟု အချို့ယူဆကြသည်။

မည်သို့ပင် ဖြစ်စေကာမူ ကျိန်စာသည် အမှန်တကယ်ရှိသည်။ ထိရောက်ပြင်းထန် ကြောက်ရွံ့ဖွယ် အန္တရာယ်ပေးသည်။ ကျိန်စာ၏ နောက်ကွယ်တွင် နမ်လောက၊ ပရလောကမှ ပုဂ္ဂိုလ်များ၊ နတ်ဘုရား တန်ခိုးရှင်များ အမှန်ရှိသည် ဖြစ်နေပါစေ
ကျိန်စာတိုက်ခြင်း၊ ကျိန်ဆဲခြင်းတို့သည် အခြား လူသတ္တ၀ါတို့အား ပျက်စီး ဒုက္ခရောက် စေလိုသော စိတ်စေတနာဖြင့် ရွတ်ဆို ကဗျည်း ရေးထိုးထားခြင်းများ ဖြစ်သောကြောင့် လူကျင့်ဝတ် ဂုဏ်သိက္ခာ ကိုယ်ကျင့်တရား ပျက်ယွင်းမှု တစ်ခုဖြစ်သည်ဟုသာ ယူဆမိပါသည်။

(ဒေါက်တာ ခင်မောင်ညွန့်၏ ကမ္ဘာ့ရှေးဟောင်း ကျိန်စာများကို ကိုးကားသည်။)
Credit – သုတဇုန်